Iruñeko sanferminen ikur nagusienetakoa entzierroa da, eta entzierroarena, berriz, hesia. Udako hilabeteetan Nafarroako hiriburua bistatzen duten turisten erakargarri, hesi horren zati bat bere horretan utziko dute Udaletxe plazan, turismo bulego berritik gertu, alegia.
Hiru zutabe, dagozkien ohol eta guzti, udaletxearen aurre-aurrean egongo dira Iruñera datozenei gogorarazteko entzierroa bertatik pasatzen dela, eta argazki polit bat ateratzeko aukera eskainiz. Udalak argitaratutako oharrean dio hesiak ez duela oztopatzen oinezkoen biderik ezta bertara bideratu ahalko litzatekeen balizko zirkulaziorik ere.
Entzierroaren ibilbidearen zati hau bere horretan mantenduko den hirugarrena da; izan ere, orain arte festa garaitik kanpo zezen plazaren sarreran eta Santo Domingoko aldapan mantentzen ziren hesiaren zatiak. Gainera, zati berri honetako zutabeetako bat entzierroan hildakoen omenez iaz jarritakoa izango da, Iruñeko Peñen Federazioaren enkarguz egindakoa.
