Zinpeko epaimahaia osatu duten bederatzi lagunek aho batez jo dute Benito Quintairos errudun. Asteartean hasi ziren erabakiaren inguruko gogoetan. Orain, epaileari dagokio zigorra ezartzea.
Bi emakumezko: Amelia Rodriguez Sardon ama eta Mari Luz Alejo Rodriguez alaba. Bortxa zantzu argiekin hilda agertu ziren, 2014ko abenduaren 10ean, Abadiñon (Bizkaia), beren etxean. Alejoren senarra atxilotu zuten ertzainek, eta hark aitortu egin zuen biak hil zituela.
Urriaren 10ean hasi zen gizonaren aurkako epaiketa, Bizkaiko Probintzia Auzitegian. 43 urteko espetxe zigorra eta 300.000 euroko kalte-ordaina eskatu dute; zati bat, andre erailen senideentzat; eta beste zatia, ustez gizonak berak lapurreta baten itxurak egiteko piztutako sutean kalteak izan zituzten enpresentzat.
