Seidei Martinez, Cristina Estebanez zenaren bikotekide ohia, hilketaren erantzule jo du zinpekoen epaimahaiak. Lau delituren errudun jo du: Estebanez hiltzea, haren orduko bikotekidea hiltzen saiatzea, legez kanpo haren etxean sartzea eta Estebanezekiko urruntze agindua urratzea. Defentsak eskatutako aringarriak ez dituzte aintzat hartu.
2010ean hil zuen bikotekide ohiak Estebanez. Epaiketan perituek argi utzi zuten prestatutako hilketa izan zela: teilatutik sartu zen etxera, soka sistema bat erabiliz; orduetako lana eskatu zion horrek.
Herri epaimahaiaren erabakia jakinda, fiskalak eutsi egin dio eskariari: 34 urte eta zortzi hilabeteko espetxe zigorra galdegin du. Akusazioek ere zigor hori eskatu dute. Epaileak zehaztuko dio espetxealdia.
