"Erabateko independentziara" bideratzen duten "batasun disolbaezinen" aldean, jarduneko lehendakari Iñigo Urkulluk "subiranotasun partekatuak" defendatu ditu. "Independentista naiz, baina XXI. mendekoa", adierazi du Urkulluk. Gogorarazi du bere alderdiaren ideien artean dagoela "independentzia eta euskal estatu propioa, zazpi probintziez osatua".
Helburu hura lortzeko, "subiranotasun pragmatikoaren" aldekoa dela azaldu du; alegia, akordioak lortzeko borondatean eta aldebikotasunean oinarrituko dela. "Espainiako alderdiek onartu eta errespetatu behar dute estatua plurinazionala dela".
"Etorkizuneko autogobernuari" buruzko kontsultari dagokionez, "barne akordio bat" lortzearen aldeko apustua egin du datozen bozetako EAJren lehendakarigaiak; hurrengo pausoa akordio hura kontsulta bidez bozkatzea litzateke, azkenik Espainiako Gorteetan eztabaidatzeko. Hala ere, Urkulluk zehaztu du berarentzat eta EAJrentzat lehentasuna dela "kalitatezko enplegua" sortzea.
