Erkoreka: « Mintegi urrezko hatzarekin aukeratu dute»

Josu Erkoreka EAJko diputatuak jeltzaleek eta EH Bilduk lehendakarigaia aukeratzeko erabili duten prozesuaren arteko alderaketa egin du. Haren esanetan, EAJ «gardentasunaren eta parte hartzearen eredu da», eta EH Bilduren lehendakarigai Laura Mintegi, ordea, «urrezko hatzarekin» aukeratu dute. Erkorekak azpimarratu duenez, Iñigo Urkulluren aukeraketa prozesua «parte hartzailea, gardena eta irekia» izan da, baina «ezker abertzalean ez da barne demokraziarik egon, inork ez dakielako zeinek aukeratu duen Laura Mintegi». Haren ustez, EH Bildu osatzen duten alderdiak ezker abertzaleak proposatutako hautagaia onartzera behartuta egon dira, «nahiz eta gustuko ez izan».