Elkarrizketa egin diote Erkorekari Onda Vasca irrati katean. "Ez litzateke zentzuzkoa izango beste zerga eredu baten oinarriak onartzea eta gastuaren alorrean ados jartzeko gai ez izatea", esan du, Euskal Autonomia Erkidegoko 2014ko aurrekontuei erreferentzia eginez.
Fiskalitatean EAJren eta PSEren arteko akordioa lantzen, "helburu garrantzitsuak lortzen eta egunero-egunero aurrerapausoak egiten" ari direla azaldu du Erkorekak; gaineratu du "asko aurreratu" dutela, baina zehaztu du oraingoz "ehuneko ehunean" ez direla ados jarri.
"Alderdien arteko lan taldeak eratuta daude. Jaurlaritza horietan da, baina ez da protagonista. Asko aurreratu da eta azken emaitza irailean ezagutaraziko da", adierazi du.
Rodolfo Ares PSEko Antolakuntza idazkariak ere esan du "aurrerapauso handiak" egin dituztela bi alderdiek, baina gaineratu du "gai garrantzitsuak" falta direla zehazteke. Radio Euskadin eginiko elkarrizketa batean, ohartarazi du akordioa ez dela "posible" izango soilik fiskalitatera mugatzen bada.
Kritika EH Bilduri
Erkoreka eta Ares kexu agertu dira EH Bildurekin. "Talde batek esatea oso zaila izango dela adostasunera heltzea, akordioaren nondik norakoak jakinak ez izanda, argi uzten du zein den talde horren asmoa: hasieratik distantzia hartzea, zergatik ez duten bat egiten justifikatzeko", adierazi du Erkorekak.
Halaber, akordioa "adostasun bokazioz" jaioko dela eta "beste alderdiren baten atxikimendua" beharko duela azaldu du Erkorekak.
