Frantziako Gobernuak lagundutako ernalkuntzarako eskubidea aitortu die bikotekiderik gabeko emakumeei eta lesbianei, eta horretarako aukera izango dute 2018tik Ipar Euskal Herriko emakume guztiek, beraz. Marlene Schiappa Emakumeen eta Gizonen arteko Berdintasunerako estatu idazkariak egin du iragarpena RMC eta BFMTV irrati eta telebista kateei eman dien elkarrizketa batean, eta azpimarratu du Emmanuel Macron presidentearen kanpainako konpromisoetako bat zela hori eta beteko dutela.
Zehatzago jakinarazi du Bioetika Legea erreformatuko dutela eta "ziurrenik" horrekin batera aitortuko dutela eskubide hori. Frantziako Etika Batzordeak ekainean eman zuen aldaketa hori egiteko oniritzia, eskubide hori emakume guztiek izateko. Gaineratu zuen inolako eragozpenik ez dagoela aldaketarako.
Emakumeen eta gizonen arteko berdintasuna Macronen agintaldiaren ardatzetako bat izango dela esan du Schiappak, eta gaineratu du Gerard Collomb Barne ministroarekin harremanetan dela emakumeen aurkako kaleko jazarpena isunekin zigortzeko.
