Zubietako errauste planta egiteko prozesu administratiboa “egin egingo da”, azaldu du Ana Oregi Eusko Jaurlaritzako Ingurumen sailburuak. EH Bilduk egitasmo hori aurrera eramateko “interes berezirik” ote duen galdetu dio gaur eguerdian, eta Oregik halakorik ukatu du. “Gure interes bakarra da lurralde guztiek hondakinak kudeatzeko beharrezko azpiegiturak izatea”.
Zubietako hondakinak kudeatzeko zentroari emandako ingurumen baimen bateratua eta ingurumen eraginaren deklarazioari buruz itaun du EH Bilduk Oregi, Eusko Legebiltzarreko kontrolerako osoko bilkuran. Gipuzkoako Hondakinen Kontsortzioak martxoaren 18an eskatu zion 2010eko baimena erabiltzeko aukera, eta apirilaren 11n baimen horiek eman zizkion, aurretik informazio publikora atera gabe ere.
