Errekaldeko bizilagunek ukatu egin dute Kukutza erortzear dela

Errekalde (Bilbo) auzoko bizilagunek ukatu egin dute Kukutza gaztetxearen eraikina erortzear dagoela. 80 arkitektorekin hitz egin ostean lortu duten erantzuna izan da, eta, ondorioz, eraikinaren eraispena burutu behar duen Cabisa enpresari eskatu diote hura geldi dezan.

Errekaldeberriren arabera, enpresa eraikitzaileak aitortu du ez duela beste obrarik aurreikusten uneotan Kukutza gaztetxea dagoen lur eremuan, «eta, ondorioz, eraikina botako balute, haren tokian kutsatutako orube bat baino ez litzateke sortuko». Gainera, auzotarren iritziz, azken hamahiru urteetan gaztetxeko kideak izan dira Kukutza mantentzeaz arduratu direnak, «eta aurrerantzean ere hala egiteko konpromisoa azaldu dute».

Auzo elkartearen ustez, konponbiderik egokiena «udalak eraikinaren jabeei ordainsari bat ematea da, arazoa konpondu bitartean Kukutzak bere jardunean jarrai dezan».