Ertzaintza oldartu egin zaie Donostian faxisten kontrako elkarretaratzean bildutako kideei

Frente Español mugimendu faxista gaur eguerdian Donostian izan dela-eta, ezker abertzaleak deituta hainbat eta hainbat lagun bildu dira elkarretaratzean han, baina Ertzaintza oldartu egin zaie.

Pio XII.a hotelaren aurrean bildu dira faxisten kontrako lagunak -han zuelako ekitaldia Frente Españolek-, eta ertzainek kasik ez die elkartzen ere utzi, hauen kontra kargatu egin dutelako segituan. Ondoren, bi gizonezko atxilotu dituzte; haietako bat, autoan zihoan, gerarazi egin dute, gizonezkoa lasterka hasi da eta atzetik jarraituta atzeman dute poliziek. E.J.E.G. (19 urte; Nafarroa) eta A.C.I. (40 urte; Cordoba, Espainia) dira bi atxilotuak.

Bihar Falange Española de las JONSek Gernika-Lumon (Bizkaia) ekitaldia egin gura du, Foru plazan, 13:00etan, eta hango Udalak Eusko Jaurlaritzako Herrizaingo Sailari ekitaldia debekatzeko eskaria egitea erabaki zuen asteazkeneko udalbatzan.

Gernika-Lumoko ezker abertzaleak bihar pertsianak jaisteko eta ikurrinak eskegitzeko deia egin du, Falange Española de las JONSen etorreraren aurrean "isilik ez geratzeko eta independentziaren deiadarra herriko txoko guztietan zabaltzeko".