Ertzaintzaren ikerketak eman ditu lehen fruituak: topatu dute atzo Lezon (Gipuzkoa) emakume bat harrapatu eta hil zuen furgoneta, eta identifikatu dute gidaria. Ezbeharra 10:15 aldera gertatu zen GI-636 errepidean, Gaintxurizketako gainetik gertu, eta gidariak bidean jarraitu zuen, Errenteria (Gipuzkoa) aldera. Ordutik zebiltzan haren bila.
Eusko Jaurlaritzako Segurtasun Sailak jakinarazi duenez, gauean topatu dute ibilgailua, eta Bingen Zupiria bozeramaileak goizean zehar emango ditu azalpen gehiago.
Emakumeak zauri larriak zituen, eta, osasun zerbitzuak hura suspertzen saiatu baziren ere, ez zuten lortu. Errepidea itxi zuten noranzko batean, eta horrek auto ilarak eragin zituen.
Azken istripu hori ez da gune horretan gertatzen den lehenengoa, eta, hori salatzeko, Gaintxurizketako bizilagunek protesta ekitaldia egingo dute gaur, 18:00etan.
