Ezkerreko aliantzak 58 aulki eskuratu ditu, eskuinak 17 eta zentristek 10. Pirineo Atlantiko mailan 17 aulki eskuraturik, Ipar Euskal Herriarentzat guztira 7 ordezkari daude: ezkerrarentzat 4 izanki PSko orain arte kontseilari zeuden Sylviane Alaux eta Frantxua Maitia, eta Mathieu Bergereta Europa Ekologia zerrendan den Alice Leiziagezahar dira ordezkari berriak. Forces Aquitaineko Jean-Jacques Lasserrek eta Michel Veunak, eta UMPko Alain Lamassourek ere kontseiluan lekua segurtaturik daukate.
Ezkerreko Fronteak ez du euskal ordezkaririk Bordelen. Pirineo Atlantiko mailan ere ez dute lortu eta negoziaketetan daude sozialistekin, departamendu mailan kontseilari bat lortzeko.
Beste lau urterentzat Alain Rousset sozialista izango da Kontseiluko presidente. Duela hamabi urte hartu zuen postua, eta hirugarren mandatua dauka beraz.
Abstentzioari doakionez, lehen itzulian baino ahulagoa izan da, % 52,73. Iparraldean %49,70eko parte hartzearekin ahula izan bada ere, lehen itzulian baino hautesle gehiagok bozkatu dute.
Eskuina galtzaile
Hauteskunde hauetako galtzaile nagusia eskuina izan da. Hain zuzen, 2004ean UDF (garaiko Modem) zentristekin batera aurkeztuz %41,08 lortu, eta guztira 21 aulki eskuratu zituzten, hots, aldi honetan baino lau gehiago. Alain Lamassoure Pirineo Atlantikoko zerrendaburuak frantziar gobernuaren buru den bere alderdiaren «ezin ukaturiko porrota gogorra» dela aitortu du. Frantziar gobernuak martxan emandako hainbat arlotako erreforma eta egitasmoak ikusirik, hautesleek «etsipena» adierazi dutela uste du. Ekonomiari lehentasuna emateko beharra sendi dela dio hautagaitzak.
Ipar Euskal Herriari doakionez, bakarrik Donibane Lohitzuneko kantonamenduan du gehiengoa lortu. Bestalde, Lapurdiko hainbat hirietan eskuinak lortu emaitzak «porrota» honen isla dira. Adibidez, Angelun, hau da Lamassouren hirian %50,28 eginez sozialistak dira lehen agertu, UMPk %33,94 eginez bigarren dela;Baiona hirian ere sozialistek %53,67 eginik, eskuina bigarren gelditu da. Hori dela eta eskualdeko UMP zerrenda buru zen Xavier Darcosek gobernuan daukan kargua utzi behar luke. Hain zuzen, gaur arte zeukan Lan ministro kargua Eric Woerth Aurrekontu ministroak hartuko du.
Emaitza hauek aurre ikusirik eta ezkerrari aurre egiteko asmoz, bigarren itzulirako «eskua luzatu» zion Forces Aquitaine zerrenda buru den Jean Lassallei baina, honek «garena geldituz bakarrik» aurkeztuko zirela argi utzi zuen.
Lehen aldia zuten zentristek bigarren itzulian bakarrik zeudela eta herri askotan sorpresa sortu dute. Erran daiteke Frantzia mailan %4 lorturik Modem alderdi zentrista ahul bada, gure eskualdean benetako indar politikoa dela. Batez ere Pirineo Atlantikoen departamenduan, UMP baino %0,87 gutxiago eginik, arras hurbil gelditu delako. Ipar Euskal Herrian ere emaitza onak lortu ditu, Nafarroa Behereko kantonamendu gehienetan bozen %40 inguru lorturik, lehen posizionatu delako.
85 kontseilari hauek lau urterentzat daude beraz Akitaniako Kontseiluan. Hain zuzen, Nicolas Sarkozy frantziar presidenteak bultzaturiko lurralde berrantolaketaren erreformak 2014rako kontseilarien desagerpena dakar. Erreforma horren bitartez, Akitaniako Kontseilua eta departamenduak mantenduko dira. Baina bozkatzerako garaian, Lurralde kontseilariak hautatuko dira. Eta Lurralde kontseilaria bi kontseiluetarako izango da hautatua.
