Zehazki, Europako Batzordeak aztertuko du Espainiak nola txertatu dituen edo txertatuko dituen bere araudian bi zuzentarau eta sei erabaki. Neurriok Europako Batasuneko kide diren estatuetan zigorrak bete dituzten presoei buruzkoak dira.
Bruselak ohartarazi duenez, estatuetako araudiak ez badira Europako Batasunaren legeriara egokitzen, "beharrezko neurriak" hartuko dituzte hala izan dadin; horien artean, ez dituzte baztertzen "zigor prozedurak".
Izaskun Bilbao EAJko europarlamentariak eginiko galdera bati erantzunez iragarri du asmo hori Europako Batzordeak. 2014 amaieran hasi zen Espainia araudia egokitzen, eta, Bilbaoren iritziz, aldaketa horien helburua da zigorrak aitortzeari buruzko Europako zuzentarauei izkin egitea: "Orain arte agintari komunitarioek hartutako posizionamenduek bat egiten dute EAJren ikuspuntuarekin".
Batzordeari eginiko galderan, Bilbaok arau erreforma horiek ezarri zituzten zenbait epairi egin zien erreferentzia, iritzita ebazpen horiek "zalantzak" sortzen zituztela Espainiako botere judizialaren independentziaren inguruan.
