Espainiako Kongresuan oposizioan dauden alderdiek helegitea jarri dute gaur Auzitegi Konstituzionalean Mozal Legea delakoaren kontra. Arrazoitu dutenez, PPk bultzaturiko Herritarren Segurtasunerako Legeak eskubideak nabarmen murrizten ditu. "Manifestazio eskubidea, informazio eskubidea eta pertsonen duintasuna" kaltetzen dituen legea dela salatu du PSOEren eledun Antonio Hernandok.
Mozal legearen kontra egin arren, EAJk, Geroa Baik eta Amaiurrek ez dute helegitea babestu. Hiru alderdiek hauteskunde kutsua hartu diote ekimenari.
Amaiurrek nabarmendu du helegitea PSOErena dela: "Ez du oposizio guztiarekin partekatu bere testua, esaterako, Amaiurrekin". Beren ustez ez dauka sinesgarritasunik ekimenak: "Eskubide zibilen eta politikoen aurkako beste itun batzuk adostu baititu, jihadismoaren kontrako estatu ituna, esaterako".
EAJk ere arrazoi beretsuengatik ez du babestu helegitea: "PSOE joan den astean PPren eskutik joan da, Kongresuan egin behar zuten ETA-GALen biktimen arteko bileraren kontra". PSOEk bere jarrera ongi argitzen ez duen artean, EAJk esan du ez duela haien testurik sinatuko.
