Ekainaren 19an izendatuko dute Felipe Borboikoa Espainiako errege, eta bertan izango dela iragarri du Iñigo Urkullu Eusko Jaurlaritzako lehendakariak. Eusko Legebiltzarreko osoko bilkuran, EH Bilduk galdetu dio Urkulluri ea tronuratze ekitaldira joateko asmoa duen.
Urkulluk argitu du oraindik ez duela gonbidapen ofizialik jaso, baina datorren osteguneko ekitaldian izateko asmoa duela; ez, ordea, aurretik eta ondoren egingo direnetan. Jarrera "kritiko eta eraikitzailearekin" joango da Urkullu, legebiltzarrean esan duenez.
Halaber, azaldu du lehendakari gisa dituen "ardurak" direla-eta joan behar duela, eta gaineratu erabaki "pertsonala" balitz ziur aski beste era batera jokatuko lukeela.
