Espainiako Estatuko "sistema autonomikoak jo" egin duela dio Egibarrek

"[Espainiako Estatuko] Sistema autonomikoak jo egin du, ekonomikoki ez delako bideragarria". Hala adierazi du gaur Joseba Egibar EAJko Gipuzku Buru Batzarreko presindenteak eta, egoera zein den kontuan hartuta, uste du euskal abertzaleek-eta "aukera politikoa" daukatela Estatuko balizko lurralde berrantolaketara begira. Hego Euskal Herriak, Kataluniak eta Galiziak erabaki eskubidea beharko lukete biharko egunean, haren arabera.

Egibarrek dio Jose Maria Aznar (PP) Espainiako gobernuburuarekin bat datorrela Estatuaren finantza arloari buruzko balorazioa egitean. Aznarrek atzo zioen Espainiako Estatua, "nola egituratuta dagoen ikusita, finantza aldetik erabat bideraezina" dela.

"Trantsizioan, abertzaletasun historikoen eskaerei bide eman beharrean, 'kafea denentzat' aplikatu zuen Estatuak, eta ahitu egin du", esan du Egibarrek Radio Euskadin. EAJko buruak aitortu du diru sarreren eta gastuen gestioan Hego Euskal Herriak duela egoerarik onena, lau herrialdeetako gobernuek kudeatzen dituztelako zergak. "Beste erkidegoetan gertatzen da gastuan Estatuaren menpeko erakundeak daudela. Beraz, Estatuko sarrerek huts egiten dutenean, nola banatuko du dirua?".