Eusko Jaurlaritzak "irmotasunez" eskatuko dio Espainiako Gobernuari indar armatuak Araba, Bizkai eta Gipuzkoatik ateraraz ditzan. Hala jakinarazi du gaur Beltran de Herediak, Eusko Legebiltzarrean eginiko agerraldi batean. Berak zuzentzen duen sailaren ildo nagusiak azaltzeko egin du agerraldia.
Herrizaingo Saila zenari izena aldatu eta Segurtasun Saila deitzeak erakusten ditu, Beltran de Herediaren ustez, "politika publikoen helburua eta segurtasun zerbitzuen ikuspegi berri bat". ETAren jarduera armatuaren amaierarekin lotu du sailburuak izen aldaketa.
Adierazi du Ertzaintzak "sorrerako espirituarekin" jardun behar duela eta "jatorrian" zuen "herritarrekiko gertutasuna" berreskuratu behar duela.
