Madrilgo Kongresuko Sustapen batzordean agerraldia egin du Ana Pastor Espainiako Sustapen ministroak. "Trenbide sare guztiaren abiadurak aztertzen ari gara, segurtasuna hobetzea ekar dezakeen erabakiak hartzeko asmoz", esan du Pastorrek. Santiagoko istripuaren ostean, tren sareko sistemak eta protokoloak gainbegiratzen ari direla gaineratu du. Asfa digital sistema gehiago garatuko dutela iragarri du ministroak.
Uztailaren 24an Galizian gertatu zen istripuaren haria, bestalde, Pastorrek iradoki du bidean 2011ko apirilean egin zen aldaketak eragina izan zuela segurtasunean. "Aurreneko proiektuan zabalera mota bat zegoen aurreikusia. Ondoren, ohiko zabalera jarri zuten. Eta erabaki horrek eragina izan zuen seinaleak jartzerakoan".
Bestalde, Renfeko langileak kontratatzerako orduan probak gogortu egingo dituzte. "Langileen baldintza psikiko eta fisikoen protokoloa berrikusiko da", esan du Pastorrek. Era berean, beharginen lanaren grabazioak hobetzeko asmoa du ministerioak. Kutxa beltzen kontrol gehiago ere izango dira.
