Gipuzkoako Batzar Nagusiek ikur bat jarri nahi dute erakunde horren eraikinaren aurrean, Espainiako bandera jartzea "inposizioa" dela gogoratuko duena. EAJren proposamena izan da, eta horren alde egin dute Bilduk eta Aralarrek. Espainiako Auzitegi Gorenak behartu du aldundia bandera hori "ohorezko" leku batean jartzera, eta horri erantzunez onartu dute gaurko testua, PSE-EE eta PPren aurkako botoekin.
Markel Olano (EAJ) zen Gipuzkoako ahaldun nagusia Gorenak epai hori egin zuenean. Eraikinaren teilatu-lauan jarri zuten orduan, "gutxi ikusteko moduan", eta horrez gain, plaka bat jarri zuten eraikinaren atean, sinbolo hori jarri ezean, "zigortuak izateko mehatxupean" zeudela gogoratuz. 2010ean izan zen hori. Gorenak, baina, plaka hori kentzeko agindu zuen, eta gainera, eraikinaren "ohorezko" leku batean jartzera behartu zuen aldundia.
Espainiaren "kalitate demokratikoa oso kaskarra" dela adierazi du Olanok. Gogoratu du "gatazka nazional bat" dagoela, eta "demokratikoki, euskal herritarren erabakitzeko eskubidearen bidez" konponduko dela.
Txema Murgiondo PPren legebiltzarkideak adierazi du onartutako testua "termino oso sektarioetan" egina dagoela, "onen eta txarren istorio zaharrez hitz egiten duena". "Instituzioak guztionak dira, eta Bilduk eta EAJk plakak jarri nahi badituzte, jar ditzatela euren herriko taberna edo batzokietan, euren diruarekin", gaineratu du. Maria Jesus Egido PSEkoaren ustez, ebazpen judizialei buruz iritzia eman daiteke, baina "bete egin behar dira beti; botere publikoek eredu izan behar lukete zentzu horretan".
