Koronabirusa espetxeetara ere iritsi da, eta, horren eraginez, Espainiako Barne Ministerioak, Espetxeetako Erakundeen bitartez, estatuko kartzela guztiak bakartzea erabaki du, Kataluniakoak salbu, haien kudeaketa Generalitatearen esku baitago. Arratsaldean hartu du neurria ministerioak. Eguerdira bitartean hamasei espetxe zituen bakartuta, koronabirusa zabal ez dadin: Zaballakoa (Araba), Madril ingurukoak, Logroñokoa, Burgosekoa eta Santoñakoa.
Neurriak euskal presoei ere zuzenean eragingo die, beraz. Hego Euskal Herriko espetxeetan lau euskal preso daude, eta estatuko besteetan, berreheun pasatxo. Presoek ezingo dute vis a vis-ik jaso; soilik lokutoriokoak, tartean beira bat dela. Abokatuak ere lokutorio bidez izango dituzte harremanak presoekin neurriak irauten duen bitartean.
Galdutako bisiten ordainetan, presoei baimena emango diete telefono dei gehiago egiteko astean. Normalean halako bi egin ahalko dituzte.
Preso batek atzo positibo eman ondoren bakartu zuten Zaballakoa, eta han dauden preso guztiei eragingo die neurriak.
