Euskal presoen eskubideen alde larunbatean izandako manifestazioarekin oso gustura bukatu duela esan du berriro Egin Dezagun Bidea mugimenduak, eta mobilizazio berriak izango direla aurreratu du, zehaztu gabe. Helburua: gaurko espetxe politika bukatu eta neurri berriak hartzea.
Hori guztia legez posible dela azpimarratu dute Beñat Zarrabeitia eta Nagore Garcia bozeramaileek gaur, Bilbon. Kasu batzuetan legedia bera ezarrita egin daitekeela esan dute —presoen sakabanaketa amaitu, gaixotasun larriak dituztenak askatu...— eta beste kasu batzuetan legea aldatuta —zigorra beteta duten presoei ez jarriz kondena berririk—.
Kartzela politika berrirako, azken batean, "borondate politikoa" behar dela adierazi du Egin Dezagun Bideak, eta Espainiako eta Frantziako gobernuei exijitu die aintzat hartzeko euskal gizartearen "gehiengoaren" eskaria.
Manifestazioarekin bat egin ez zuten eragileei, berriz, "hitzetik ekintzetara" pasatzeko eskatu diete Zarrabeitiak eta Garciak. Esaterako, EAJk ez zuen bat egin deialdiarekin, aldarrikapen nagusiekin ados egon arren.
Euskal gizarteari presoen eskubideen alde mobilizatzen jarraitzeko galdegin diete.
