Europako hauteskundeak
Estaturik gabeko nazioek Europan behar bezalako ordezkaritza izan dezaten lortzea da EA, ERC eta CHAren arteko koalizioaren xedea
EA Europako hauteskundeetara Kataluniako ERC alderdiarekin eta Aragoiko CHArekin aurkeztuko dela berretsi du gaur Unai Ziarreta idazkari nagusiak. EAk batzarra egin zuen atzo Gasteizen ERCrekin eta CHArekin lortutako aurreakordioaren berri militanteei emateko. Ziarretak azpimarratu duenez, estaturik gabeko nazioei Europan behar bezalako ordezkaritza ematea eta "politika progresistak" bultzatzea da koalizioaren helburua.
Azken batean, eskubide nazionalak eta eskubide sozialak uztartu nahi ditu EAk ERCrekin eta CHArekin osatutako koalizioak. "Helburuak gure eskubide historikoak lortzea eta herritarren bizi kalitatea zein gure nazioen ekonomia hobetzea dira", adierazi du Ziarretak. Ildo horretatik, bi lan ardatz nagusi izango dituztela agertu du: "Batetik, politika progresistak bultzatzea baldintza sozialak hobetzeko eta aberastasunaren banaketa bidezkoagoa lortzeko. Arlo nazionalean, estaturik gabe nazioek Europan behar bezalako ordezkaritza izan dezatela erdiestea".
Iruzkinak
Ez dago iruzkinik
Ordenatu
