ETAko zuzendaritzako kide izan zirela-eta, erakunde armatuak eginiko hainbat atentaturengatik (25) auzipetu ditu orain Espainiako Auzitegi Nazionalak. Hain zuzen, gizateriaren kontrako krimenak egin zituztela leporatuta auzipetu dituzte. Dignidad y Justiciak eta Luis Portero fundazioak eskatuta hasi zituen auzibideak Espainiako Auzitegi Nazionaleko epaile Pablo Gonzalezek. Urrutikoetxea atxilotzeko nazioarteko agindua igorri du Auzitegi Nazionalak.
Autoak Josu Urrutikoetxea, Garikoitz Aspiazu, Mikel Karrera, Aitzol Iriondo eta Aitor Elizaran auzipetu ditu. Halaber, Urrutikoetxea atxilotzeko nazioarteko agindua igorri du Auzitegi Nazionalak.
2004tik aurrerakoak ikertzen ari da epailea, urte horretan jaso baitzuten Espainiako zigor kodean gizateriaren aurkako delitua. Legelariak, baina, ez daude erabat ados. Delitu horrek lotura estua du nazioarteko zuzenbidearekin —Justizia Unibertsala deiturikoarekin, zehazki—. Gobernuak 2004an egin zuen transposizioa ez zela egokia izan salatu dute hainbat magistratuk. Auzitegi Goreneko Francisco Monterdek, adibidez, gogoratu zuen delitu hori bereziki arautu eta aztertu behar dela Espainiak sinatu dituen nazioarteko itunen arabera, eta, horietan oinarrituta, epaileak uste du ETAren "terrorismoa" ezin dela gizateriaren aurkakotzat jo.
