Etxe husteak saihesteko bitartekari zerbitzuarekin bat egin du Kutxabankek

Zorpetutako familientzako hipoteka bitartekaritza zerbitzuarekin bat eginez, lankidetza hitzarmena sinatu dute Kutxabankek eta Eusko Jaurlaritzak. Bitartekaritza zerbitzuak konponketak lortu nahi ditu hipotekak ordaindu ezin dituzten familien eta bankuen artean. Etxebizitzak 350.000 euro baino gehiago balio ez baditu, familiaren ohiko bizitokia bada eta familiak bankuarekin akordiorik lortu ezin badu, hipoteken bitartekaritza zerbitzuak egingo du proposamen bat, zorra kitatzeko modua egiteko. Bitartekaritzak hilabeteko epea izango du proposamena egiteko, eta Kutxabankek konpromisoa hartu du erreklamazio judizialik ez egiteko bitarte horretan.

Jaurlaritzak eta Kutxabankek atzo sinatu zuten ituna, eta, justu atzo, etxe huste bat galarazi zuen Stop Desahucios taldeak, Irunen (Gipuzkoa). Kutxabankek etxea husteko agindu zion jabeari, baina Stop Desahucios taldekoek elkarretaratzea egin zuten atarian. Kutxabankeko abokatu batekin bilera egitekoak dira gaur, jabearekin negoziatzeko eskatzeko.