Bankuei, erakunde publikoei eta alderdi politikoei etxe kaleratzeen aurkako "konpromiso zehatzak" eskatzeko, larunbatean manifestazio bat egingo dute Donostian, Stop Kaleratzeak elkarteak deituta. 12:30ean hasiko da, Bulebarrean.
Ane Martin elkarteko kideak esan du Espainiako Gobernuak oraindik ez duela legea aldatu eta bankuek ez dituztela geratu maileguen ordainketarik ezagatik harturiko neurriak, nahiz eta etxetik kaleratzear ziren lagun batzuek euren burua hil duten azken hilabeteetan. "Gainera, epaitegietan era horretako etxeen enkanteak ugaritu egin dira. Finantza erakundeak euren kontuak orekatu nahian ari dira edo horrelako etxe gehien banku txarrari eman nahi dizkiote".
Besteak beste, Kutxabank EAEko bankuaren jarrera salatu du Stop Kaleratzeak elkarteak, "hilabeteotan harturiko konpromisoak ez baititu bete. Gai honegatik kaltetuta dauden bere bezeroei ez die irtenbiderik eskaini".
Alderdi politikoei elkartearen ekimen legegilea babesteko eskatu die, Eusko Jaurlaritzari etxebizitza politika berri bat egiteko, udalei ez lan egiteko etxe kaleratzeak egiten dituzten bankuekin, Kutxabanki bere politika soziala aldatzeko, eta herritarrei egoera honen aurka "borrokan" jarraitzeko.
