07:45 aldera sartu da Rodrigo Rural Kutxak Atarrabian duen sukurtsal batera, eta bertara kateatu da. Hainbat herritar bertaratu dira Rodrigori babesa ematera. Espainiako Polizia ere joan da, baina ez dute aterarazi, eta aurrezki kutxako ordezkari batekin hitz egin du telefonoz.
Zorra kitatzeko etxea hipotekaren truke ematea eskaini dio Rural Kutxak, baina dokumentu idatzi bat sinatu ezean ez zela sukurtsaletik aterako jakinarazi du Rodrigok. Pello Gastearena Atarrabiako alkateak egin ditu bitartekari lanak, eta idatzizko akordio batera heldu dira Gastearena eta Rural Kutxa, zorra kitatzeko etxea ematea adostuz. Sukurtsaletik irten, eta Rodrigo identifikatu du Poliziak.
Rodrigok salatu du orain arte Rural Kutxa ez dela negoziatzeko prest azaldu. Webgune batean azaldu du bere kasua, eta oihartzun zabala izan du itxialdiak #urkorenetxea traolarekin.
