EAJk proposatutako sei kidek, EH Bilduk proposatutako lauk, PSE-EEko hiruk eta PPko bik osatuko dute zuzendaritza. Sarasola ETBko zuzendaria izango da, Kruzeta EITBko irratietako zuzendaria, Aranburu estrategia arduraduna eta Elgezabal kudeatzailea.
Maite Iturbe EITBko zuzendariak gaur aurkeztu ditu hedabide publikoko zuzendaritzako kideak. Administrazio kontseiluaren aurreneko bilera egin dute gaur, eta bertan aurkeztu dituzte zuzendaritzako kideak.
Alberto Surio ordezkatu du Iturbek EITBko zuzendaritzan. Ostiralean egin zuten ekitaldi bat, karguaren ordezkapena irudikatzeko. Ostegunean izendatu zuen legebiltzarrak Iturbe EITBko zuzendari, eta agindu zuen kudeaketa "zorrotza eta estua" egingo duela.
