Etxeko lurrean konposta egitea sustatuko dute Gipuzkoako 30 herritan

Hondakinen kudeaketan, prebentzioa da garrantzitsuena, Imanol Azpiroz Gipuzkoako Hondakinen Partzuergoko kidearen hitzetan. Baita materia organikoarekin ere: «Herri txikietan etxe guztiek dute lur zati bat eskura; haietan, xedea izan beharko luke organikoa etxean bertan edo komunitatean konpostatzea». Probintziako 30 bat herritan bide hori «ja» hasteko prest daudela adierazi du Azpirozek. Usurbilgo esperientzia gogorarazi du: 500 familiak egiten dute konposta etxean, eta orain martxan jarri dute proiektu berri bat, konposta egiteko lurrik ez dutenentzat: lorategi eta parkeetan komunitateentzako konpostagailuak jarri dituzte. Eredu hori herri txiki guztietara zabaldu beharrekoa ikusten du Azpirozek.