Europako abokatu talde batek eskatu du uzteko epaituei lanean segitzen

Kezka azaldu du Europako abokatuen elkarte batek Bateragune auzia dela eta. Demokraziaren eta Giza Eskubideen Aldeko Legelarien Elkarteak ohar bat egin du, eta adierazi du auzipetuek aukera beharko luketela hasitako lanean jarraitzeko: «Ez dira kriminalizatu behar. Modua behar dute konponbide baketsu eta demokratikoaren aldeko ahaleginean segitzeko». Egoera politiko berria aintzat hartzeko eskatu dute, eta salatu dute terrorismo kontzeptua baliatuz ekimen politikoak jartzen dituztela auzitan Espainian, «salbuespen legeen» bidez.