Europako Parlamentuak Copyright baimena moldatzeko proposamena eztabaidatu du gaur, eta kontrako ahots ugari eragin dituen proiektua baztertzea erabaki du. Aurkako 318 boto jaso ditu, aldeko 278 eta 31 abstentzio.
Zuzentaraua aldatzeko proiektuak Interneteko hainbat plataforma askeren kritikak jaso ditu, baita sektoreko zenbait enpresa handirenak ere. Lehenengoek ohartarazi dute "internet irekia" kaltetuko lukeela. Aurka agertu direnen artean da Wikipedia plataforma. Protesta modura, webgunea itxi du gaur. Parlamentuak proiektua baztertu ostean, berriz ere jarri du martxan zerbitzua.
Wikipediak ohar bidez azaldu duenez, proiektuak "Europako egile eskubideak gaurkotu eta gizartearen iformazioan herritarren parte hartzea sustatu beharrean, lineako askatasuna mehatxatu eta filtro, muga eta debeku berriak ezarriko ditu".
Wikipedia bera arriskuan legokeela ohartarazi du entziklopedia askeak. Izan ere, arau berriak zaildu egingo luke albisteetara sare sozialen bidez eta bilaketa motoreen bidez sartzea.
Zuzentarauaren sustatzaileek erantzun dute proposamenak ez liekeela Wikipediaren gisako plataformei eragingo, eta "albiste faltsu kanpaina" bultzatzea leporatu diote Google-i. Alex Boss europarlamentari kristaudemokrata alemaniarraren esanetan, proiektuaren helburua da "interneteko sortzaileek beren ekarpenengatik ordain bidezko bat jasotzea".
Proposamena begi onez ikusi dute hainbat artistak, eta 1.300 sortzaile baino gehiagoren babesa bildu du; horien artean, Paul McCartney eta James Blunt musikariena.
