Euskal hedabideen salaketa sostengatu du Mitterrandek

Atzo Baionara egindako bidaian, Frederic Mitterrand Frantziako Kultura ministroak arrazoia eman zien diskriminazioa salatu zuten euskal hedabideei. Diskriminazioa saihesteko asmoz, irizpideak aldatzea eskatuko dio CPPAP batzordeari, «ingelesez egindako hedabide bati legozkiokeen eskubideak» bermatzeko. Batzorde horrek Frantzian sarean ezartzen diren hedabideei laguntza eman edo ez deliberatzen du. Ipar Euskal Herriko Hitza, Kazeta.info eta Okzitaniako La Setmana argitalpenei diru laguntzak ukatu edo murriztu zizkien batzorde horrek, euskara hutsezkoak direlako. Gainera, informazio orokorra lantzen duen hedabide izaera ukatu zien, argudiatuta euskaraz dakitenek baino ez dutela irakurtzen. Mitterrandek jakinarazi zuen kasua hurbiletik aztertzen ari dela eta batzorde horri irizpideak aldatzea proposatuko diola. «Konstituzioko 75-1 artikuluak Frantziako altxortzat hartzen ditu eskualdeetako hizkuntzak», erran zuen. CPPAP batzordeak Hitza-ri helarazitako gutun batean puntu bera nabarmentzen zuen: azaldu zuen aipamen horrek ez diela neholako eskubiderik aitortzen.