Espainiako Gobernuak Bilbon duen ordezkaritzaren aurrean egin dute aurkezpena Independentistak sarekoek. Kide batzuek suziriak pizten zituzten bitartean, beste batzuek konstituzioaren azalaren kopiak apurtu egin dituzte.
Independentistak sareko bozeramaile Txutxi Ariznabarretak nabarmendu du Espainiako konstituzioa "azken 40 urtean Euskal Herriko nahiak eta asmoak mozteko tresna" izan dela, eta hori areagotu dela azken asteetan, Katalunian prozesu subiranistaren kontrako erasoen eta 155. artikuluaren ezarpenaren ondorioz. "Euskal Herria ez da oasi bat", esan du, "eta hemen ez gaude eraso eta mehatxu horietatik salbu". Kataluniako prozesuak "espainiar ultranazionalismoaren alderik beltz eta makurrena" agerrarazi duela erantsi du.
Horren aurrean, dei egin die Euskal Herriko eragile eta herritarrei "urratsak egiteko" eta estatu egiturak sortzen joateko "euskal errepublika lortzeko bidean".
