Aurreko urteetan egin bezala, aurten ere Euskal Herrira etorri dira Euskal Herriaren Lagunak (EHL) sareko kideak; Leitzara, zehazki. Alemania, Italia, Irlanda, Paris, Madrid, Andaluzia, Aragoi, Portugal eta Herrialde Katalanetako kideak batu dira, 25 ordezkari guztira. Hainbat eragileekin biltzeaz gain, hasia den ikasturte politikorako lan ildoak ere erabaki dituzte.
Gaur egindako agerraldian, aurtengo ikasturteari jarritako erronkak azaldu dituzte, Euskal Herriak bidelagun gaitu kanpainaren bitartez garatuko dituzten erronkak, alegia. Batetik, “Euskal Herriarekiko Estatu espainiar eta frantsesak” duten “paper errepresiboa” salatzeko konpromisoa hartu dute, norbere herriadean. Horrekin batera, “Euskal Herrian egingo diren dinamikak” indartzeko erabakia ere hartu dute, urtarrileko euskal presoen eskubideen aldeko ohiko manifestazioa, kasurako. Bestalde, “Euskal Herri libre eta sozialista baten eraikuntzan arlo ezberdinetan ematen ari diren pausuak” ezagutzera eman nahi dituzte Euskal Herriaren Lagunek haien herrialdeetan.
Jakinarazi dutenez, ikasturteari amaiera emateko manifestazio internazionalista egingo dute Madrilen. Diotenez, “internazionalismoa praktika politiko bezala indatu” eta “kurtso osoan batutako indarra erakutsi” nahi dute ekimen horren bitartez.
