Unai Rementeriaren hautagaitza aurkeztu du EAJk Mundakan. Ekonomia eta lanpostuak izan ditu hizpide Bizkaiko Batzar Nagusietarako jeltzaleen zerrendaburuak: "Orain arte egindako lana da gure bermea. Bizkai berri bat eraiki dugu, Europako eskualde garatuenen parekoa eta etorkizun paregabea duena".
Haren aurretik, ordea, Itxaso Atutxa EAJren BBBko buruak hartu du hitza, eta EH Bilduren larunbateko ekitaldia izan du hizpide. Atutxak nabarmendu du EAJk "jendearen benetako arazoak konpontzen" dituela eta koalizio abertzalea, berriz, "betikoan" dabilela, eta nabarmendu du estatuak "ekintzekin" eraikitzen direla, eta ez hitzekin.
Ekitaldian izan dira EBBko buru Andoni Ortuzar, Bizkaiko diputatu nagusi Jose Luis BiIbao eta Bilboko alkatetzarako hautagai Juan Mari Aburto ere.
