Urtarrilaren 13an Bilbon euskal presoen eskubideen alde egingo den manifestazioak emango dio urteari hasiera, eta amaiera, berriz, Iruñean eman diote. Euskal presoak etxeratzeko Kalera Kalera dinamikak egin duen deiarekin bat egin dute ehunka eta ehunka herritarrek.
Manifestariak Barañaindik, Arrotxapetik eta Atarrabiatik abiatu dira. Autobus geltoki zaharraren parean bat egin dute, Iruñerria kalera, presoak etxera leloa idatzia zuen pankarta baten atzean. Handik aurrera, joaldunek eta Nafarroako bandera batek ireki dute manifestazioaren bidea.
Bukaerako ekitaldian testu bat irakurri dute antolatzaileek, eta seinalatu dute presoak eta iheslariak beharrezkoak direla "gatazkaren konponbidean" sakontzeko. "Haien ekarpena osoa izateko, etxean behar ditugu".
Kalera Kalera dinamikak gogorarazi du azken hilabeteetan herritarrek egin duten lana, eta ondorioztatu dute herritarren eraginez lortuko dela presoak etxeratzea. Horretan jarraitzeko prest agertu dira, eta urtarrailaren 13ko manifestaziora joatera dei egin dute: "Denak gurekin izan arte borrokan segituko dugu".
