"Saihestezina eta premiazkoa den erronka batek bildu gaitu: euskal preso politikoen giza eskubideen berehalako errespetuaren eskaerak". Halaxe esan dute lehengo eta gaurko ordezkari instituzional askok, gaur Donostian emandako prentsaurrekoan. "Iraganean ikuspegi eta postura desberdinak izan ditugu presoen aferari buruz. Gaur egun, ordea, premiazkoa ikusten dugu kartzela politika denbora berriei egokitzea, iraganeko irizpideak alboratuz eta giza eskubideen errespetua abiapuntu berri gisa finkatuz".
Espainiari eta Frantziari egin dizkieten eskaera: presoak Euskal Herrira ekartzea, "bizi osorako zigorra" bertan behera uztea eta zigorra bete duten presoak askatzea, zigorraren 2/3 eta 3/4 beteta dituzten presoak kaleratzea, gaixotasun larriak dituzten presoak ere aske uztea, eta espetxe politika egokitzea.
"Euskal gizartearen gehiengoaren itxaropena egiazko eta bidezko soluzioetara dago bideratuta. Gatazka betiko konpondu eta haren ondorio guztiei irtenbidea emateko, ezinbestekoa da preso eta iheslarien egoera ere konpontzea", adierazi dute lehengo eta gaurko hainbat alkate, zinegotzi, parlamentari eta batzarkidek.
Bat egin dute Herrira mugimenduak larunbat honetarako hiri eta herrietako plazak betetzeko egindako deialdiarekin.
