Euskal selekzioak lagunarteko partida jokatuko du gaur, Irlandaren aurka, Azpeitian, Garmendipe zelaian (Gipuzkoa, 18:00, ETB1). Emakumezko taldeak jokatuko duen bosgarren partida da. 2006an bi aldiz jokatu zuen Argentinaren aurka, 2008an Txile izan zuen aurkari, eta 2012an, azken partidan, 1-0 irabazi zion Eslovakiari Arrate Oruetaren golari esker.
Irlanda aurkari gogorra da, 19. da UEFAren sailkapenean eta 30.a FIFArenean. Herenegun 1-3 galdu zuen Errusiaren aurka, eta ia ezinezko du Munduko Kopan sartzea. Azken-aurreko partidan, baina, oso estu hartu zuen Alemania munduko txapelduna (3-2). Euskal selekzioari dagokionez, 18 jokalari sartu dira deialdian, gehienak Realekoak eta Athleticekoak. Atzo egin zuten entrenamendu bakarra, Lezaman, eta gaur goizean bideo saioa egingo dute aurkaria ezagutzeko.
