Eusko Legebiltzarrak Gasteizerako beste erietxe bat nahi du, Txagorritxun

Eusko Legebiltzarrean onartu egin dute Gasteizen, Txagorritxuko erietxearen ondoan, beste ospitale bat eraikitzea proposatzen duen emendakina. Talde guztiek eman dute aldeko botoa, Aralarrek ez beste. Emendakin horren bidez eskaria egin diote Eusko Jaurlaritzari; Gasteizerako eta Arabarako erietxeen eskaintza «indartu eta hobetzeko» eskatu diote. Horretarako, egungo bi erietxeak -Santiago eta Txagorritxu- bere horretan mantentzeaz gain, hirugarren ospitale bat eraikitzea proposatzen duen hautua defendatu dute, eta Txagorritxuko egungo eraikinaren ondoan egin behar dela, gainera. Emendakinaren puntu horretan bat egin dute Aralar ez beste, gainerako alderdi guztiek, baina testuaren beste puntu batzuetan adostasuna ez da izan hain handia.