Eusko Legebiltzarreko bakerako eta elkarbizitzarako lantaldea osatu dute gaur goizean, Arantza Quiroga Legebiltzarreko presidenteak gidatutako saioan. Zalantzan zegoen lantaldeak presidenterik izango ote zuen, eta, gaur Quirogak berak baieztatu duenez, ez du presidenterik izango.
EAJtik Joseba Egibarrek, PSE-EEtik Jose Antonio Pastorrek, PPtik Anton Danboreneak, Aralarretik Aintzane Ezenarrok eta Ezker Anitzatik Mikel Aranak osatu dute taldea. UPDk eta EAk ez dute parte hartu, lantaldearen aurka bozkatu baitzuten.
Aralarrek gaur goizean argitaratutako ohar batean azaldu du alderdiak ez duela Legebiltzarreko lantaldean parte hartuko, eta Aralarreko legebiltzarkideren batek bertan parte hartzen badu "bere izenean" egingo duela jakinarazi du, "alderdi politikoaren gehiengoaren iritzia ordezkatu gabe".
"Talde parlamentarioko kideren batek parte hartzen badu, alderditik kanpo kokatuko du bere burua berriro, martxoaren 30eko bilkuran gertatu zen bezala", gaineratu dute.
Aralarrek berretsi du martxoan lantalde hori sortzeko asmoa ezagutu zenean agertu zuen ezezko jarrera, "sentsibilitate eta indar politiko guztiek aukera berdintasunean parte hartzeko aukera baztertzen delako".
Egutegia zehaztu beharra
Bakerako lantaldeko kideek egutegia zehaztu beharko dute orain, eta gonbidatuko dituztenen zerrenda osatu. Aste honen amaieran edo hurrengo astearen hasieran zehaztuko dute egutegia.
EAJ, PSE-EE, PP, Ezker Anitza eta Aralarreko hiru legebiltzarkideren babesarekin egin zuen aurrera lantaldeak, joan den martxoaren 30ean.
Jesus Loza elkarbizitza eta memoria sustatzeko arduradunak ETBn egindako adierazpenetan esan du alderdien artean "urteetan izandako desadostasunen" ondoren lantaldeak "zuzenekoa eta zentzuduna den elkarrizketa" ahalbidetuko duela.
