Urriaren 21ean izango da Eusko Legebiltzarreko legealdiko lehen osoko bilkura, eta parlamentuko mahaia osatzea izango da egun horretako zeregina. Horri begira, PPko legebiltzarkide Alfonso Alonsok esan du "zentzuzko jarrera, argia eta etorkizunera begirakoa" izango litztekeela "mahaiaren pluraltasuna errespetatzea eta bermatzea".
PPko zortzi legebiltzarkideek gaur aurkeztu dituzte kreditazioak, eta orduan hitz egin du Alonsok mahaiaren osaketaz. Bost kidek osatzen dute mahaia, eta bi ordezkari izatea eskatzeko asmoa du EAJk. Bana izango lukete EH Bilduk, Elkarrekin Podemosek eta PSE-EEk, eta, hortaz, mahaitik kanpo gera liteke PP.
Alonsok adierazi du ez dagoela "gehiengorik" eta, beraz, ez duela zentzurik PP "baztertzeak"; "gogoetatzeko" eskatu du, eta ohartarazi PP mahaitik kanpo uztea "hasiera kaskarra" litzatekeela: "Ez diezaiotela PPri atea itxi, legealdia luzea baita eta gauza asko egongo baitira hitz egiteko".
Soilik PSEko zortzi legebiltzarkideak falta dira kreditatzeko. Asteartean egingo dute.
