"Atzerapausoa". Hala deskribatu du Josu Erkoreka Eusko Jaurlaritzako bozeramaileak Guardia Zibilak atzo EPPKren mintzaidetza taldearen kontra eginiko operazioa. Azaldu duenez, Espainiako Barne ministroa "tematuta" dago sinetsarazten "ezer ez dela aldatu", baina gaineratu du egoera aldatu egin dela: "Euskadin bakea eta bizikidetza indartzeko aukera historikoa dago".
Hori horrela, "jarrera positiboa" izateko eskatu dio Madrili Erkorekak, eta "elkarrizketa eta gizarteratze prozesu baten alde" egitea galdegin dio.
Ertzaintzak lagun bat zauritu eta atxilo eraman zuen atzo Bilbon, Guardia Zibilaren operazioaren kontra protestan ari zirela. Horren inguruan, Erkorekak esan du Ertzaintza "kalean segurtasuna bermatzera" mugatu zela.
