Ezker abertzaleak astelehenean aurkeztuko ditu estatutuak, Euskalduna jauregian

Ezker abertzaleak datorren astelehenean aurkeztuko ditu bere alderdi politiko berriaren estatutuak eta ezaugarriak, Bilbon, Euskalduna jauregian egingo duen ekitaldi batean. 11:00etan hasiko da agerraldia, eta, BERRIA.INFOk jakin duenez, ehunen bat lagunek hartuko dute parte; horien artean, hainbat lagun ezagunek. Lokarri herritar sarea ari da gonbidapenak bidaltzen.

Rufi Etxeberria ezker abertzaleko kideak eta Iñigo Iruin abokatuak emango dute estatutuen berri. Aurrenak "arrazoi politikoak" azalduko ditu, eta Iruinek xehetasun juridikoak.

Alderdia erregistratzera handik bi egunera joango dira, asteazkenean, Espainiako Gobernuaren Barne Ministeriora.

Hilaren 19rako, berriz, manifestazioa antolatuko dute egoera politikoarekin kezkatuta dauden hainbat gizarte eragiletako ordezkariek eta pertsona ezagunek, ezker abertzalea legeztatzeko eskatzeko. Bilbon izango da martxa. BERRIAk jakin duenez, sustatzaileek ahalegin berezia egingo dute euskal gizarteko pentsaera guztietakoek manifestazioarekin bat egin dezaten. Ekimenari buruzko xehetasunak astebete lehenago eman nahi dituzte, agerraldi publiko batean.

"Indarkeria errefusatu" egingo du alderdiak

Rufi Etxeberriak eta Marian Beitialarrangoitiak joan den azaroaren 27an Iruñean emandako prentsaurreko jendetsu batean jakinarazi zuten ezker abertzaleak alderdi politiko berria izateko estatutuak aurkeztuko dituela Barne Ministerioan eta euren erakunde horrek Espainiako Alderdien Legea beteko duela. Hala, besteak beste, "indarkeria erabiltzea edo erabiltzeko mehatxua errefusatu" egingo du alderdiak. Etxeberriak berak 2010eko uztailaren 22an Oarsoaldeko Hitza-ko elkarrizketan garbi hitz egin zuen: "Ezker abertzalean bide politiko eta demokratikoen aldeko apustua egin dugu. Beraz, bide honek ez du onartzen jardun armaturik".

Alderdi berri horren egitura eta funtzionamendua "demokratikoa" izango da, eta autonomia osoarekin jardungo du, "interferentzietatik eta inongo menpekotasun edo baldintzatzetik libre".

2002ko ekainaren 27an jarri zuten martxan Alderdien Legea, PPk eta PSOEk bultzatuta, eta Gorenak 2003ko martxoan utzi zituen legez kanpo Batasuna, HB eta EH, "ETAren tresna eta ETAkoak" zirela argudiatuta.

Harrezkero, Espainiako Justiziak legez kanpo edo baliorik gabe utzi izan ditu AuB eta herri platafomak 2003an, HZ 2004an, Aukera Guztiak 2005ean, EAE-ANV (herri hautagaitza erdiak eta foruetako ia guztiak) eta ASB 2007an, D3M eta Askatasuna 2009an. 'Salbatu' izan diren bakarrak: EHAK 2005ean eta Iniciativa Internacionalista

-ezker abertzaleak haien aldeko botoa eskatu zuen-. Gorenak 2008an EHAK eta ANV ere legetik at jarri zituen.