Gazteen botoa eskatu du gaur Patxi Lopez PSE-EEren lehendakarigaiak. Alderdiko 400 bat gazterekin bildu da Gasteizen. Eskerrak eman dizkie alderdiko kide egiteagatik, "ez baitira garai errazak alderdi batean egoteko". Gazteak politikatik urruntzen ari direla ohartarazi du. "Ulertzen ditut horren arrazoi batzuk. Gobernuak ez dira gai izan botere ekonomikoak kontrolatzeko. Ez dugu maila eman, eta herritarren zati handi batek bizkar eman digu". Horri aurre egiteko botoa eskatu die Lopezek gazteei, "neoribelarismo ase ezinari" aurre egiteko.
Edozein alderdiri botoa ematea ez da berdin, haren esanetan. "Jokoan asko dago hauteskundeetan: herrialde eredua, eredu ekonomikoa eta gizarte eredua". Iñigo Urkulluren aurka gogor jo du Lopezek: "Betikoen gain utzi nahi ditu mozketak". Beste bide bat proposatu du PSE-EEk: zerga iruzurrari aurre egitea, "krisiaren zama" banatzea eta zergak behar baino gutxiago pagatzeko "lege zirrikituak" ixtea.
