Fermin Martinez, Zuriñe Gojenola eta Artzain Santesteban gazte independentistak atxilotu egin dituzte Erroman

Fermin Martinez, Zuriñe Gojenola eta Artzain Santesteban gazte independentistak atxilotu egin ditu gaur Italiako Poliziak Erroman, haiek prentsaurrekoa eman aurretik. Espainiak Erroman duen enbaxadaren iturrien arabera, hiru gazteak euren egoera azalduz paperak banatzen ari ziren Via de Corso etorbidean, eta pankarta bat zabaltzera zihoazela atxilotu ditu Italiako Poliziak. Komisaldegira eraman dituztela ere esan dute, baina ondorengo informaziorik ez dago.

Espainiako Poliziak azaroan gazte independentisten aurka egindako operaziotik ihes egindako hiru lagunek hedabideen aurrean agerraldia egitekoak ziren Erroman 13:00etan, Legebiltzarraren aurrean, euren egoera azaltzeko eta gatazkaren irtenbide politikoa aldarrikatzeko. Hara bidean zirela atzeman ditu Poliziak.

Fernando Grande Marlaska Espainiako Auzitegi Nazionaleko epaileak agindu zuen orduko operazioa, eta atxilotutako 37 gazteetatik 33 espetxera bidali zituen, Segi legez kanpoko erakundeko kideak direlakoan. Harrezkero egin izan dituzte beste atxiloketa batzuk.

Hain zuzen, Jose Luis Rodriguez Zapatero Espainiako gobernuburua Erroman dago gaur, eta Silvio Berlusconi Italiako lehen ministroarekin bildu da 13:00etan.

Ion Telleria, aske, baina euroagindu saioaren zain

Ion Telleria (Idiazabal, 28 urte) libre utzi du gaur Paueko (Okzitania, Frantzia) epaileak, baina astearterako hitzordua jarri dio, euroagindu saioa egiteko. Grande Marlaska epaileak hura Espainiaratzeko eskaera egina du, Segiko kidea dela egotzita.

Telleria atzo atxilotu zuen, Lapurdin, Frantziako Poliziak. Azken hilabeteotan bizi da Urruñan, eta "bizitza publikoa" egiten du, Amnistiaren Aldeko Mugimendiak dioenez. Info7 irratiko kazetaria da -arratsaldeko albistegia aurkezten du-.