Jorge Fernandez Diaz Espainiako Barne ministroa Patxi Lopez lehendakariarekin eta Rodolfo Ares Barne kontseilariarekin bilduko da egun batzuk barru, PPko iturriek jakinarazi dutenez. Iturri horiek berak esan dute Mariano Raxoi Espainiako presidentea Lopezekin eta Iñigo Urkullu EAJko presidentearekin bilduko dela otsailean. Horien arabera, bi euskal politikariak Madrilen hartzekoa da Raxoi, eta aipatu dutenez ETAk borroka armatua utzi ondoren sortu den egoeraz mintzatzekoak dira. Albiste hori, ordea, ez dago baieztatuta.
Hain zuzen, PPk EAJri eta PSE-EEri egin dion azken deiaren harira, ezker abertzaleak gaur esan du "elkarrizketa politikoa eta akordioa direla bide bakarrak gatazka politikoaren konponbiderako", baina gaineratu du "eraginkorra eta benetakoa izan dadin" nahitaezkoa dela Euskal Herriko indar politiko guzti-guztien artekoa izatea, "betorik eta bazterketarik gabe".
Elkarrizketa horretarako badaudela baldintza nahikoak adierazi du Maribi Ugarteburu ezker abertzaleko kideak. Dei egiten dio PPri ekin diezaion, "premiaz", normalizazio politiko eta demokratikoan aurrera egiteko "nahitaezkoak" diren bi gaiei: "batetik, eragile politiko guztien legalizazioa, jarduera politikoekiko kriminalizazioa eta jazarpenari amaiera emanez; eta bestetik, Euskal preso politikoen eskubide guztien errespetuan oinarritutako neurriak hartzea".
