Jorge Fernandez Diaz Espainiako Barne ministroak esan du albiste "bikaina" dela Estrasburgok Ines Del Rio euskal presoari buruz emandako epaia berrikustea, eta gaineratu du Espainiako auzitegiek ez dituztela giza eskubideak urratzen.
"Espero dugu Espainiako Gobernua eta Espainiako auzitegiak izatea espetxe politika zehazten dutenak, eta ez beste batzuk, giza eskubideak urratzen direla argudiatuta", adierazi du Fernandez Diazek.
Alberto Ruiz-Gallardon Espainiako Justizia ministroa ere itxaropentsu azaldu da, eta espero du Estrasburgok Espainiari ematea arrazoia.
