Jorge Fernandez Diaz Espainiako Barne ministroak Bruselan nabarmendu du Parot doktrina ez zaiela soilik "terroristei" ezartzen, baita "serieko kriminalei, hiltzaileei eta bestelako delitu higuingarriei ere".
Gaineratu du dagoeneko hitz egin duela gaiaz beste herrialde batzuetako Barne ministroekin, eta "sentiberatasuna" agertu diotela gaiaren inguruan. Haren arabera, estatuek "eskubidea dute erabakitzeko euren politika kriminalaren eta zigorren aplikazioaren gainean".
Parot doktrina ezarri zion Espainiak Ines del Riori, eta presoa aske uzteko agindu zion Estrasburgok Espainiari. Ez zuen hala egin, eta estatuak jarritako helegitea aztertuko du auzitegiak martxoaren 20an.
Euskal presoaren auzia Europako Giza Eskubideen Auzitegian defendatuko dute: Mark Muller, Amaia Izko, Michael Ivers eta Didier Rouget abokatuek. Haiekin aritu da lanean Sudhanshu Swaroop abokatua ere.
