Erandio-Altzagako iazko jaietako propaganda liburuxkan agertutako iragarki batengatik Erandioko Hegoalde Kultur Elkarteko zuzendaritzako lau lagunek eta Jai Batzordeko buruak inputatu gisa Espainiako Auzitegi Nazionalera joan beharko dute deklaratzera, Fernando Grande-Marlaska epailearen aurrera.
"Independentzia eta sozialismo-zaleen gune askea", "euskal presoak etxera!" edota "Erika [presoa] maite zaitugu!" jartzen du iragarkian. Arrano Beltzaren ikur bat ageri da, halaber.
Bost lagunei datorren astelehenerako jarri diete hitzordua, Madrilen.
"Lotsagarria da, adierazpen askatasunaren aurkako erasoa izateaz gain, halako iragarki batengatik Espainako epaitegi zentral batek diligentziak hastea", esan du Erandioko Bilduko udal taldeak gaur.
Domeka honetan herriko talde eta eragile batzuek kasua salatzeko agerraldia egingo dute: 12:30ean, Erandio-Altzagako metroko geltokian.
