Frankismoak errepresaliatutako pertsonak omentzeko ekitaldia antolatu du Arabako Foru Aldundiak gaurko. Ondorioz, gonbidapena egin dio Javier de Andres ahaldun nagusiak frankismoko krimenen aurkako euskal plataformari. Horrek, ordea, uko egin dio ekitaldian parte hartzeari. PPk frankismoko krimenen inguruan duen jarrera izan da arrazoi nagusia, izan ere, plataformaren iritziz "hipokresia hutsa da biktimak omendu eta, aldi berean, biktimarioen inpunitatea babestea".
Azken hilabeteetako gertakariak jarri ditu plataformak jarrera horren erakusle. Gasteizko Udalean martxoaren 3ko hilketen edozein justifikazio baztertzeko eta Espainiako Gobernuari Argentinako epaitegi batek frankismoko krimenen hemeretzi arduradun atxilotzeko ateratako autoa bete dezala eskatzeko mozioa eztabaidatu zen joan den azaroaren 24an. PPk, ordea, abstenziora jo zuen. Edonola, "gai honen inguruan iritzia emateko aukera berri bat" izango duela jakinarazi dio plataformak PPri, hurrengo asteetan antzeko mozioa eztabaidatuko baita Arabako Biltzar Nagusietan. Alde horretatik, "frankismoak errepresaliatutako milaka arabarrei egin ahal dion omenaldirik onena" mozioa onartzea eta Argentinako prozesua babestea dela gogorarazi dio plataformak PPri.
Bitartean, "frankismoko inpunitatearen aurkako borrokak gaur egun duen garrantzia" azpimarratuta, gaurko ekitaldira ez joatea erabaki du frankismoko krimenen aurkako euskal plataformak. Gainera, biktimak omentzeko deia egin die alderdi politiko guztiei, Argentinako kereila babestuta eta Espainiako Gobernuari Servini epailearen aginduak betetzeko eskatuta.
