Frantziako Gobernuko Garraio Ministerioak AHT abiadura handiko trenaren Bordele-Hendaia proiektua onartu du, RFF tren konpainiak iragarri duenez. Bordele-Okzitaniako Tolosa zatiko egitasmoari ere balekoa eman dio.
RFFren arabera, tokian tokiko eragileen ekarpenak kontuan hartu ditu gobernuak eta, hala, hasierako plana %40 egokitu du. 'Frantziako hego-mendebaldeko tren proiektu handia' bezala ezagutzen da.
Egitasmoak jasotzen duenez, Bordeletik Ipar Euskal Herrirako zatia, Mont de Marsan eta Akize iparraldetik pasatu ostean, Baionako geltokira helduko da lehenik, hirira ekialdetik sartuta. AHTak gero kosta paretik segituko du Hendaia aldera, bost kilometro barnetik. Biriatuko autobideko ordainleku ingurura iritsiko da, eta hortik Hendaiako geltokira.
Gobernuak 2013ko lehen hiruhilekorako erabilpen publikoari buruzko azterketa egingo du.
